Hikayat Ibrahim Hasan “Gisa U Banda”

Moto Geureubak dijak u Sigli
Di pudieng camplie ngoen boeh kupila
Ujong lon puta punca lon putie
Supaya meukri sambongan haba

Leupah meusigak awak seudati
Bak ayoen gaki ngoen jaroe dua
Ibrahim Hasan ta karang rawi
Baca hai akhi dusoen ngoen kuta

Lheuh jeut sarjana teuma bak UI
Asisten ekonomi diangkat sigra
Asistem di Fakultas Ekonomi UI
Ekonomi industri bidang jih nama

Han tren tempoe dudoe ka jibri
Asisten ahli teumpat nyang sama
Dalam asuhan Muhammad Sadli
Bandum jituri di Indonesia

Di Blang Bintang na pawang Rani
Di Blang Pidie na pawang Baka
Bak siuroe po banta saidi
Le Pak Sadli ka geubi tanda

Hat nyan geutayoeng bak bungoeng giri
Soai kursi teumpat keurija
Ta deungoe bagah ulon peugah kri
Na dua bagi jalan keu gata

Nyang saboeh cara jeumba ulon bri
Asisten ahli peulayan hamba
Peulayan raja koen ka ta tukri
Hana soe turi siumu masa

Gata poeh tuboeh ruoh meu guci
Ula ilie siboek keurija
Bah that beurancak bak tagrak bibi
Han soe akui peulayan raja

Jalan keudua teuma ulon bri
Mita kursi beu jeut keupala
Beu that beu ubit keubit ugari
Komdian hari gob turi nama

Jeut keu pimpinan peutimang keumudi
Gata gob turi ban saboeh masa
Jinoe beurangkat leugat keumbali
Bak University Syiah Kuala

Puwoe ngoen binoe sigoe bek lanti
Bak Fakultas neigri nyang ban di buka
Meunan amanah Muhammad Sadli
Ngoen hate suci geubuka cara

Tajak u Langsa mita teurasi
Pasoe lam guni puwoe u Banda
Ibrahim Hasan yoeh nyan hai akhi
Akai geuputie geumita cara

Ureung koeh ruboeng di gampong ili
Di Samahani na eungkot paya
Jeut keu peulayan memang han meukri
Hana soe turi rang kajan masa

Ta pula padee sabe dalam ie
Ta pula capli bak tanoeh data
Bak keuh lon mita nyang na kurusi
Bah beube sawi ji meuhoi keupala

Meunan tapike kande johari
Laju ngoen Siti meupakat sigra
Siti Maryam jawaban geubri
Ikot suami ngoen hate rela

Nibak masa nyan Maryam Siti
Teungoeh Tuhan bri hamil pertama
Teungoeh meungandoeng apoen han sakri
Maklum seudiri dum kawoem hawa

Timoeh di Saree teubee meuriti
Di Padang Tiji timoen geupula
Ka putoeh pakat ka bulat janji
Beudoeh peureugi ureung nyan dua

Ka tinggai Jawa Kota Beutawi
Woe jak meugabdi keupada bangsa
Nibak Unsyiah tugas ka jibri
Bak fakultas Ekonomi tamoeng keurija

Jeut Rektor Muda Fakultas Ekonomi
Perguruan Tinggi Aceh Mulia
Di Darussallam sinan domisili
Teurimoeng gaji pangkat F tiga

Jeut keu sekretaris Fakultas Ekonomi
Golom gob turi masa nyan nama
Seubab ban pinah dari Beutawi
Jaringan komunikasi golom teubuka

Di Keumbang Tanjong na gampong Pasi
Pukat meuriti teungoeh geu suja
Siti Maryam wate nyan wahe akhi
Deungoen suami hudep bahgia

Ibrahim Hasan malam ngoen hari
Disampeng dekti jarak hamtom na
Bak beuleun limoeng po bungoeng giri
Budak juhari lahee u donya

Tanggai dua nam catatan hari
Lahee si bayi Mei nam ploeh dua
Mirza Irwansyah Allah peudali
Ayah ngoen ummi seunang lagoina

Lahee aneuk phoen tangloen kudangdi
Ban bintang pari cahaya muka
Aneuk pih agam ruman ugari
Malam ngoen hari sabe geu doda

Sipanyang jalan lam peukan Pidie
Leumo meuririti troeh malam jula
Oeh lheuh lahe kande putehdi
Dua thoen lagi lahe adinda

Meuturot – turot ikoet meuriti
Bandum putri lahee u donya
Nyan keuh hareuta nyata Allah bri
Maryam Siti seunang lagoina

Thoen nam ploeh peut geuseubot dali
Lahe nyang putri aneuk keudua
Nama Julita Fairina Susanti
Bak beuleun Juli tanggai dua ploeh dua

Julita Fairina teuma hai akhi
Sideh di Beutawi lahe u donya
Ibrhim Hasan dang dilua negri
Ileume jak cari di Amerika

USAID Amerika dana dum jibri
Geuwoe keulai thoen nam ploeh lima
Tamat NBA bak Syracuse University
Bak beuleunJuli ka meudum tanggai

Watee ka hasee kande keudang di
Hana keumbali bak Syiah Kuala
Sideh di Jawa teuma berdomisili
Lam sanubari laen rencana

Hana le galak bak dosen negri
Ho laen seugi mita keurija
Paduep boh teumpat meuhat ka jibri
Golom meurasi di dalam dada

Dang cok putusan jalan nyang pasti
Watee nyan sandi troek dari Banda
Majid Ibrahim peumimpin tinggi
Yuwoe keulai bak Syiah Kuala

Seubab sayang keu perguruan tinggi
Oeh lheuh PKI lawan negara
Akhe nam limoeng po bungoeng giri
Geuwoe keulai teuma u Banda

U Darussalam riwang keulai
Jabatan geubri meu bagoe rupa
Seubab geupike kande johari
Rata seugi ileumee kana

Oeh lheu beurontak awak PKI
Lhee droe meuturi peu teubit SK
Beuntuk pasukan lam Perguruan Tinggi
Putra ngoen putri latih keu teuntra

Di Darussalam saban terjadi
Ka ji mulai cok mahasiswa
Ka habeh jiba keudeh Mata ie
Malam ngoen hari jilatih teuntra

Ibrahim Hasan meunan cit akhi
Watee nyan jibri ileumee teuntra
Jibri jabatan komandan tinggi
Di perguruan tinggi Syiah Kuala

Komandan Bataliyon langsong ka jibri
Ato srategi Men Mahadasa
Komandan resimen beuken han sakri
Rektor keundali sigala punca

Majid Ibrahim pimpin seundiri
Putra ngoen putri Men Mahadasa
Men Mahadasa beuna ta turi
Peukoeng ideologi peutheun negri

Ibrahim Hasan peungetahuan tinggi
Rata seugi pengalaman kana
Masa Jepang gob nyan ka ahli
Malam ngoen hari latih keu teuntra

Ikot peujuang malam ngoen hari
Sabe pribumi bela neugara
Dalam sikula masa di Sigli
Hana pre hari latihan teuntra

Timphan beulukat manngat han sakri
Pajoeh ngoen kupi jampu ngoen bada
Ta puwoe kisah bagah hai akhi
Maryam Siti haba tarika.

Thoen nam ploeh nam bak beuleun Juli
Lahe u bumi lom bijeh mata
Aneuk nyang keu lhee teunte Allah bri
Rosalina Juliani geu meuhoi nama

Tanggai ka meudum jeum ka meukri
Lahe u bumi tanggai dua ploeh dua
Dua theon tempoe dudoe meudali
Lahe lom putri keunoe u donya

Thoen nam ploeh lapan Allah teukeudi
Siti Fajar Suryani lahe lom teuma
Tanggai limoeng blah jeulah na bukti
Ji tamoeng hari lam beuluen dua

Thoen tujoeh ploeh yoeh saboeh rawi
Irma Ferdianti lahe lom teuma
Bak tanggai siblah geu peugah dali
Lahe Ferdianti bak beuleun dua

Limoeng boeh sinyak bijak han sakri
Peut droe putri saboeh peumuda
Siti Maryam seunang tiep hari
Deungoen suami hudep seujahtra

Musem luwah blang meuladang campli
Watee teuka ie padee tapula
U Darussalam ta riwang rawi
Baca hai akhi mandum syedara

Ibrahim Hasan ulang keulai
Dosen Fakultas Ekonomi bak Syiah Kuala
Tamoeng keurijak lanja tiep hari
Peulajaran geubi keu mahasiswa

Di Darussalam sinan meungabdi
Baroe mulai gob turi nama
Seubab ka lazem geutem peuduli
Lam organisasi kayem deuh muka

Thoen nam ploeh tujoeh yoeh saboeh rawi
Deungoe lon khuen kri lon samboneg haba
Di Darussalam aman tiep hari
Fakultas ekonomi leubeh lom teuma

Ibrahim Hasan Rahmad Allah bri
Ji peu ek gaji pangkat raya
Bak Unsyiah Fakultas Ekonomi
Jibri kursi Rektor keupala

Ureung lisek ceurdek han sakri
Bhai ekonomi lua keupala
Oeh lheuh MBA di lua neugri
Geujak lom study u Philipina

Thoen tujoeh sa masa mulai
Di Quezon City geujak beulaja
Geu jak geu woe laloe han sakri
Maryam Siti tinggai di Banda

Meubagoe bidang geu peulham diri
Ileumee jak cari di nanggroe lua
Soai sikula hana peu kheun kri
Rata seugi ban saboeh donya

Geu ikot peusan silam bak umi
Masa geu dodi lam ayoen ija
Ileumee donya mita tiep hari
Hana peudoli soai biaya

Masa sikula di lua neugri
Nafkah geubi le Cut APa
Muzakkir Walad ingat tiep hari
Keu Maryam Siti kirem biaya

Sabee tiep beuleun balueng geu bri
Ret Hasan Basri seulaku Sekda
Hingga seulusoe geuwoe keulai
Beulanja geubri u rumoh tangga

Guna Pak Walad meuhat meuguni
Han geu kaji siumu masa
Sabe geu ingat meuhat lam hati
Sidroe Ilahi nyang ek troek hingga

Ateuh gle Kulu musue rapai
Oeh malam sunyi deungoe suara
Muzakir Walad urueng that ahli
Geumat keumudi siploeh thoen masa

Aceh wate nyan memang dang seui
Teunaga ahli geutayoe hana
Madjid Ibrahim pimpinan University
Universitas neugri Syiah Kuala

Ibrahim Hasan hat nyan mulai
Geuboeh keu waki di gob nyan teuma
Sekda wate nyan Pak Hasan Basri
Soai administrasi lua keupala

Ibrahim Hasan karangan geubri
Bak Hasan Basri seulaku Sekda
Konsep pidato geu ato rapi
Yoeh goh mulai Geubernur baca

Meunan keuh sabe kande johari
Pandangan geubri meunurot kada
Muzakir Walad sangat meungeurti
Ureung nyang ahli sabe geu baba

Musem keumukoeh timoeh kupanji
Mudah raseukiumat lam donya
Ibrahim Hasan tariwang rawi
Le pak Muzakir ka geubri jeumba

Bah di Darussalam berdomisili
Teutapi gaji ban saboeh nyan na
Miseu contoh deungoe hai akhi
Nibak industri pih na keurija

Nyan bri pandangan bidang ekonomi
Nibak industri tingkat Dista
PT. Panca Usaha pih na raseuki
Anggota ahli bidang reuncana

Anggota Bakopda pih na cit gaji
Peulom hai akhi pat laen teuma
Miseu Sabang Peulabohan resmi
Disinan gaji limoeng ploeh dola

Dipeucaya keu teunaga ahli
Deputy ekonomi bidang jih nama
Sayang bacut pocut johari
Sabang di anti le ureung lua

Teumpat seulodapan meunan ji rawi
Teuntra peulisi sabe di jaga
Di mita jalan Sabang beu sunyi
Akai di cari meubagoe rupa

Dum inang – inang malang ngoen hari
Meu guni – guni jiba plueng ija
Ji mita daleh peu lubeh bukti
Abeudo Gani peunyulud raya

Silusen pengan bak tangan kiri
Jikheun meukodi ji peusoem ija
Meunan keuh sabe kande kudangdi
Hab di rawi nyang hana – hana

Lam koran Medan meunan jikheun kri
Baca le meuntri dumna beurita
Jiba pitnah ngat bagah sunyi
Sabang le meuntri beu jitoep sigra

Gubernur Aceh jadeh ji taki
Watee Pak Hadi musibah teuka
Jitoep Sanbang sayang han sakri
Gadoeh raseuki dum urueng desa

Sampoe an jinoe hansoe peudoli
Sabang ka sunyi hana le subra
Hana le kapai dari lua neugri
Jeut keu peutani peudagang dumna

Cicem subang lam kawan nuri
Mirah pati sijudoe dua
Ibrahim Hasan riwang keulai
Baca bek sunyi wahe syedara

Kareuna gob nyan memang that ahli
bidang ekonomi han soe ek sangga
Bek jeut keu hireum ngoen iri hati
Teunaga ahli meuhai biaya

Le that bidang gob nyan kuasai
Seubab meungerti dumna peukara
Aceh wate nyan malang han sakri
Rata seugi soe uroeh hana

Keu jeut nanggroe han soe peuduli
Dum hase bumi hana soe puga
Hase gunoeng ngoen hase pasi
Hana soe gali teunaga hana

Watee koeh pade hase su guni
Glah keu campli han glah keu sira
Seubab lampoeh blang tan irigasi
Laloe ta preh ieh troen ujeun raya

Salah saboeh teungoeh geu kaji
Lam perguruan tinggi Syiah Kuala
Cetak sarjana bek na berhenti
Bidang ekonomi bidang agraria

Bidang pertanian meunan cit lagi
Mangat geu tukri peugadoeh hama
Ureung nyang pike keu hase peutani
Beu jeut ek haji oeh lheuh seumula

Di Darussalam gudang keurani
Putra ngoen putri teunoeh beulanja
Bak Ibrahim Hasan pulang keumudi
Ureung nyang tukri peu teubleut mata

Wate ie paseung udeung di ili
Bak bineh pasi umieng kuala
Ibrahim Hasan ta riwang rawi
Supaya meukri seunamboeng haba

Thoen nam ploeh nam catatan meuri
Uleh pak meuntri peutubiet SK
Bak beuleun siblah tanggai sa mulai
Bak Fakultas Ekonomi jeut keupala

Jeut keu dekan fakultas ekonomi
Di Perguruan Tinggi Syiah Kuala
Meuturot – turot troeh lhee kali
Hansoe saingi ceureudek raya.

Karangan : Nurman Syamhas

Tulisan ini dipublikasikan di aceh, budaya, hikayat, Indonesia, travel, writing. Tandai permalink.

Tinggalkan Balasan

Alamat email Anda tidak akan dipublikasikan. Ruas yang wajib ditandai *