- Ateuh puncak glee hana le awan
Ka peungeuh trang ban saboeh donya
Beuleun Februari jibri ujian
Bak watee nyan thoen namploeh sa
- Mandum mahasiswa teuma wate nyan
Ikot ujian dalam sikula
Meunan cit bagou Ibrahim Hasan
Tamoeng ujian tingkat sarjana
- Hana trep tempoe dudoe hai rakan
Laju watee nyan ka ji wisuda
Luloeh sarjana hana halangan
Bak masa nyan beuleun puasa
- Hate gembira hana pat lawan
Ibrahim Hasan kirem berita
Keudah bak ayah bagah bri pesan
Geu kheun ujian ka sempurna
- Disampeng bak nyan pih na geupesan
Bak ayah ngoen nang sigoe ban dua
Sikula ka tamat meuhat ka aman
Neubri tunangan keu uloen sigra
- Geukheun di Jawa kana pilihan
Siti Maryan geurasi nama
Jinoe hai ayah bagah neu pinang
Beujeut tunangan kamoe bandua
- Watee geubaca haba lagee nyan
Laju Toke Hasan ka salah sangka
Hana setuju laju geukheun ban
Aneuk lon tuan kawen di lua
- Hana jithee droe lagoe siagam
Keupeu tunangan mita di Jawa
Hana teuingat martabat mayang
Ile lam badan darah ulama
- Pakoen han jiwoe keunoe ugampong nang
Mita tunangan siri yang hawa
Keupeu aneuk gob jijak drop sinan
Suke turunan ta turi hana
- Aneuk syeedara dara peurawan
Siri yang seunang sinoe ku mita
Sinoe di Aceh leubeh nibaknyan
Ureueng teupandang suke ulama
- Hana ulon tem peukawen ngon nyan
Yoh goeh lon tuban turonan bangsa
Dalam hatee teupike reujang
Jinoe pakiban lon cok keunira
- Na padup uroe dudoe nibak nyan
Geu bungkoh barang geujak u Jawa
Hana ureueng thee tuentee masanyan
Meusapat pih tan na geubri haba
- Keudeh u Priyoek katroh berjalan
Watee ka malam keunan troh teuka
Abdullah Mahmud sujud bri salam
Hate that seunang katroh syedara
- Duek piyoeh payah peugah khabaran
Geutayoeng yoeh nyan ubak adinda
Wahe adoe ta deungoe cutbang
Ta peugah beutang bek tasom punca
- Toeh siri inoeng meukeunong han ban
Ibrahim Hasan ka jatoh cinta
Soe nan ayah peugah beureujang
Toeh keturunan pane geuteuka
- Bapak Abdullah peugah masanya
Siti Maryam geurasi nama
Aneuk Teungku Akob tangkuloek manyang
Gampong halaman di Bandar Dua
- Cucoe Teuku Husen hai lem Budiman
Ngoen awak Palembang meukawen teuma
Asai di Idi beu neu tukriban
Teuku Husen nyan jiboh le Beulanda
- Watee Teuku Husen meukawen di peurantauan
Na aneuk badan sidroe nyang dara
Siti Aminah geupeugah nan trang
Siti Maryan nyan keuh ibunda
- Asai di Aceh bijeh aneuk nyan
Hana peu bimbang turonan bangsa
Beudoeh geutayoe jinoe hai abang
Laju ta pinang taba ngon tanda
- Bapak Abdullah peugah ube trang
Di toke Hasan seunang lam dada
Han salah mita simuda seudang
Mantoeng jipandang turonan bangsa
- Uroe pih beungoh beudoeh awak nyan
Bak ayah Marya laju geuteuka
Geujak meuturi abi Ibrahim Hasan
Ngoen calon bisan watee nyan teuma
- Watee meureumpok meupok pandangan
Lheuh mumat tangan duek peugah haba
Keudeh keunoe geu muproe cangan
Cok keputusan laju ngon sigra
- Ta singkat haba teuma hai rakan
Kalheuh tunangan awaknyan dua
Tanggal siblah nikah watee nyan
Beuleun Juli bak thoen namploeh sa
- U Tanjong Priyok tawok undangan
Sinan bak jalan geukheun Jepara
Ureueng dum teuka dara ngon agam
Sampoe an malam ramee leumpah na
- Tajak u Yogja sewa geuritan
Deuh peumandangan indah lagoina
Habeh acara ka jula malam
Geucok awaknyan sigo bandua
- Peutroen cong sandeng ireng u dalam
Siti Maryam deungoen judonya
Tinggai lam kama teuma masanyan
Laju teubayang peu geukeurija
- Peu meucugak ateuh bak lawan
Aneuk mie itam di ateuh bara
Retnoe pih jadeih ret deh pih jantan
Dua awaknyan adu teunaga
- Kapai Beulanda teuka meukawan
Leumah meureuntang lam laot raya
Dak miseu tantra banna seunapan
Meumet oen pisang ji timbak sigra
- Sipaleut tanoeh teungoeh teubeuntang
Tameh watee nyan sibak geupula
Dak miseu badeuk kadeuk sabohjan
Bandeuh makanan peulom jisaba
- Padum trep sabe meurante badan
Nyoe keuseumpatan kalheuh uluwa
Jimeuloet burak ngon jalak hitam
Di dalam padang hana soe publa
- Meunan kheun bagoe po muda seudang
Ibrahi Hasan laloe leumpah na
Hana pre supot geutot meureuyam
Aneuk geu pasang beungoh ngon sinja.
Oleh : Nurman Syamhas.