Ibrahim Hasan
- Tatoep tupong gulong keu timphan
Balot on pisang lheuh taboh saka
Bak siuroe po muda seudang
IbrahimHasan jak sikula
- Geujak keudroe hansoe bri jalan
Geujak pasoe nan beujeut sikula
Meunan cit dilee watee beut Qur’an
Ibrahim Hasan keudroe geu tuka
- Oehka seulusoe geujak pasoe nan
Baroe geu peutrang teuma bak poma
Ramee nyang ikot dilikot gobnyan
Nyang sabe rakan tamong sikula
- Woe bak sikula teuma oh malam
Jak beut Qur’an lagee biasa
Sikula rakyat meuhat watee nyan
Jameun Jeupang gohlom merdeka
- Sinan di Gigieng lhe thon timang
Teuma lheuh nyan pinah sikula
Pinah u Tijue laju watee nyan
Ibrahim Hasan hana le ngon ma
- Watee sikula teuma masanyan
Tinggai gob nyan bak kawan bapa
Bak kongsi abi nan toke sawang
Uroe ngon malam sabee geujaga
- Di toke sawang na aneuk agam
Ngon Ibrahim Hasan saboh sikula
Asai ka beungoh beudoh awaknyan
Jak taloe jalan meugandang dua
- Beungoeh beurangkat neuhat awaknyan
Tiep uroe Tuhan geujak beulanja
Keudeh u Sigli gari geu peutran
Ngoen Usman Sawang ileumee jak mita
- Woe bak sikula poe muda seudang
Meureunoe yoh nyan bidang agama
Lhe thon di Tijue laju oh lheuh nyan
IbrahimHasan gisa lom bak ma
- Nanggroe Sigli hai akhi karu hana ban
Teungoh jiprang uleh Beulanda
Bandun sikula hana nyang jalan
Ibrahim Hasan riwang gampong ma
- Di Gigieng lansong geu sambong rijang
Tamat glah nam di sinan sigra
Oh akhe thon langsong ujian
Ibrahim Hasan tamat sikula
- Keupala sikula teuma Guru Hasan
Got that geu sayang keu murid dumna
Ibrahim Hasan watee ujian
Kareuna got tulesan luloh sigra
- Sikula rakyat tamat watee nyan
Laju le rijang pinah u Langsa
Tamong SMP kande jeunulang
Tapi watee nyan bangku tanlena
- Bak Muhammadiyah bagah catat nan
Nam beuleun sinan pinah lom teuma
Seubab bak neugri ka jibri peusan
Ibrahim Hasan tamong sikula
- Yoeh di Langsa teuma watee nyan
Ibrahim Hasan tinggai ngon Bapa
Sajan ngon abi domisili sinan
Bak masanyan jeut toke ija
- SMP Langsa teuma masa nyan
Meugah hana ban awai meurdeka
Saboh di Langsa nyang na lagee nyan
Saboh treuk meunan di Kuta raja
- Aneuk peujabat intat dum keunan
Disampeng bak nyan aneuk saudaga
Meunan cit guru meujampu sinan
Batak Padang ngon ureung Jawa
- Masa sikula Ibrahi Hasan
Rame rakan nyan sibaya
Abdullah Ali, Ibrahim Alfian
Meusapat sinan saboh sikula
- Oeh akhe masa teuma awak nyan
Ban saboh kawan gob turi nama
Bandum hebat nyang tamat sinan
Meuteumee jabatan nibak neugara
- Jeut keu Profesor bandum awak nyan
Nyan luloh sinan oh akhe masa
Sayang bacut Ibrahim Hasan
Nibak watee nyan lalo leupahna
- Tuwoe sikula teuma di gobnyan
Dawok peutimang atra nyang kana
Di gobnyan lalo uroe ngon malam
Bak weng kilang Toke Hasan Langsa
- Laloe cop bajee teuntee di gobnya
Keu peulajaran peuduli hana
Untong bak guru jibri su reujang
Jiba laporan ubak ayahda
- Laju di ayah ubah pikeran
Ibrahim Hasan pinah sikula
Bah kheuh lon ba u kota Medan
Mangat siagam bekle lam manja
- Putoeh pakat beurangkat reujang
Keudeh u Medan geuba aneukda
Thon limong sa bungka u Medan
Tamoeng yohnyan SMP Kesatria
- Kareuna carong Ibrahim Hasan
Sithoen disinan tamat sikula
Tamat SMP tanlee pikeran
Tamong reujang ubak SMA
- Bagian sosial geucok jurusan
Di kota Medan SMA Pembina
Sikula kristen beuken hana ban
Dum peulajaran got that dijaga
- Rame guru nyang koen Iseulam
Bri peulajaran watee nyan teuma
Ureueng Batak cangklak hana ban
Nyo hana seunang laju jitampa
- Baroe teu ingat meuhat wateenyan
Ibrahim Hasan teuntang agama
Watee insaf lam hatee badan
Teuntang Iseulam agama beuna
- Nyang ke meureunoe baro yoh silam
Asoe Al Qur’an jameun sajan na
Keu asoe kitab teuingat reujang
Hukom Iseulam haleu ngon hana
- Seubab lam hatee teu patre iman
Lam pergaulan mudah lagoina
Bah that sahabat hana Iseulam
Ibrahim Hasan gangguan hana
- Oeh troh kutika masa ujian
Ibrahim Hasan hantom na lupa
Tuleh Bismillah bagah watee nyan
Bak keureutah ujian barangjan masa
- Guru kaloen pakon lagee nyan
Ibrahim Hasan ji tuleh kata
Meunan sabe tiep uroe Tuhan
Keureutah ujian Bismillah kana
- Lam hate guru laju watee nyan
Ji teuka sayang jitamah angka
Beureukat Bismillah mudah peulajaran
Angka lapan ka jri jeumba
- Masa sikula di kota Medan
Ibrahim Hasan kurueng beulanja
Seubab bak ayah sosah bantuan
Nanggroe teungoh prang hubungan hana
- Thoen limong sa kon ka tatuban
Aceh ngon Medan hubungan hana
Thon limong lhee meuteuntee saban
Ibrahim Hasan sosah lagoina
- Peutron boh tektok cok keusimpulan
Laju watee nyan jak mita keureuja
Peunyambong udep lam kota Medan
Bek keulaparan teungoh sikula
- Jeut tukang masak sinyak masanya
Keupada rakan nyang muda – muda
Oeh ban beudoh eh keudeh u peukan
Jak bloe barang sigala rupa
- Oeh lheuh meubloe puwoe le reujang
Ibrahim Hasan taguen lom teuma
Oh lheuh maguen po buleun trang
Ngui pakaian jak bak sikula
- Sikula inggreh meuceh watee nyan
Poh siploh siang tamong beulaja
Meunan sabee kande jeunulang
Sunggoeh hana ban bak jak sikula
- Lawet sikula di Kota Medan
Sigala bidang ikot beulanja
Watee supot ikot ngon rakan
U lapangan jam meuen bola
- Oeh watee woe manoe reujang
Ohka malam meureunoe biola
Hana tempo meureunoe hat nyan
Sigala bidang geu beulaja
- Watee di Langsa jahet pakaian
Watee di Medan meuen biola
Jeut bacut sapeu Ibrahim Hasan
Peu lom hai rakan bidang agama
- Thoen limong limong si bungong peukan
Tamat yohnyan bak sikula
Bah sosah payah bak geucah jalan
Lhee thon timang luloh SMA
- Luloeh sikula angka that maayang
Ibrahi Hasan tamong juara
Tamat sikula di kota Medan
Peugot rancangan laen keunira
- Kareuna carong Ibrahim Hasan
Rame wate nyan bantu biaya
Jok bea siswa meuseunoh hat nyan
Teutapi gob nyan teutap geusaba
- Soe manyang angka teuma wateenyan
Gubernur Medan bantu biaya
Watee ka tamat carat jih riwang
Sinan di Medan jibri keurija
- Teuma nyang laen jitem cit meunan
Jibri bantuan ngon jak sikula
Hana meusaboh peu punoh harapan
Seubab yah gobnyan pih ureueng kaya
- Gohlom peureulee lakee bantuan
Meunan geu peusan uleh ayahda
Watee ka luloh troh ayah keunan
Ibrahim Hasan ka geu pareksa
- Jinoe gata hai muda seudang
Ngon tulong Tuhan luloh sikula
Peuna reuncana nyang ka ta pasang
Cuba ta peutrang ubak ayahda
- Bak lon hai ayah sosah bacut tan
Bansum lon pulang ubak ayahda
Ho nyang galak yujak lon tuan
Ngon hatee seunang ulon keureuja
- Meutuwah raya gata hai intan
Citka lageenyan hukom agama
Bek sagai aneuk peuseuk wasit nang
Desya bak Tuhan dudoe geu siksa
- Teuma ayah bagah geu peusan
Tacok jurusab bhah meuniaga
Jurusan ekonomi bak UI sinan
Bek peutamong nan keudeh bak GAMA
- Ikot Pak Mitro jinoe hai agam
Saboeh jurusan tamong sikula
Bhah ekonomi ahli that gobnyan
Gata pih meunan oh dudoe teuma
- Putoeh pakat leugat masa nyan
Bungkoh pakaian peu – peu nyang na
Beudoh lanja po muda seudang
U Beulawan beurangkat sigra
- Geu intat le yah bagah wateenyan
Sira geu peusan ubak enukda
Hai boh hatee pike beu matang
Hai aneuk badan ingat lam dada
- Ta keubah kamoe sinoe hai intan
Ayah deungon nang tinggai bandua
Gata beurangkat seulamat jalan
Beutroeh tariwang ohka seumporna
- Doa bak kamoe uroe ngon malam
Lam peudidikan gata bek ceuma
Beulheuh sikula teuma hai agam
Dalam ujian beumayang angka
- Nyang peureule that ingat keu Tuhan
Uroe ngon malam bek sagai lupa
Pubut ibadat tobat barangjan
Beu teugoh iman di dalam dada
- Bek beurangkahoe duduoe meulang – lang
Ingat seumbayang wahee aneukda
Seubab agama kana lam badan
Asoe Al Qur’an kalheuh beulaja
- Bidang sikula buka pikeran
Asai ujian bek miyeub angka
Jaga marwah ayah deungon nang
Wate ta riwang beujeut sarjana
- Habeh peutuwah bak yah masanyan
Ibrahim Hasan laju ka geuwa
Peulheuh rindu laju wateenyan
Di Beulawan bineh dermaga
- Lheuh mumat jaroe sigoe ngon rakan
Tamong yohnyan lam kapai raya
De Ereen geukheun kapai nyan
Ibrahim Hasan ka jadeh bungka
- Kapai dijak meugrak geulumbang
Troeh Tanjong Pinang meurapat sigra
Jipeutroen saoh piyoh disinan
Ladoem peunumpang jitron u kuta
- Leumah peuraho meu ato panyang
Ureueng bloe barang meubago rupa
Keunan meuhudom bak ujong buritan
Inong ngon agam bloe barang lua
- Oeh lheuh pasoe ie keulasi kheun ban
Bandum peunumpang tamong lam kama
Katroh watee teuntee masanyan
Kapai le reujang beurangkat teuma
- Nyang muda – muda dumna peunumpang
Hate that seunang takalon rupa
Na padum uroe dudoe hai rakan
Katroeh le yoh nyan laju u jawa
- Teungoh u darat laju laugat wateenyan
Ibrahim Hasan ikot seureuta
Teubit u lua jak mita kandran
Teupat tujuan katroh le jiba
- Kana teumpat meuhat nyang aman
Bekna gangguan watee sikula
Padum uroe tempo lheuh nyan
Tamong le reujang ubak sikula
- Tamoeng bak UI Ekonomi jurusan
Di Metropolitan kota Jakarta
Sikula UI cit gob turi nan
Kon seumbarangan keunan jiteuka
- Nyoe hana carong ngon kong bantuan
Bak sikula nyan han jeut beulanja
Nyan kheuh sikula nama pilihan
Meugah hana ban di Indonesia
- Aneuk ureueng gab ji intat keunan
Ngon moto sedan tamong sikula
Ayah deungon ma nyang na jabatan
Nyoe ureueng awam hana peu cuba
- Teusebut haba teuma hai rakan
Ibrahim Hasan meuwoe calitra
Tamoeng sikula hana le reunggang
Oeh lheuh Mapram laju beulaja
- Hana le lalee lagee sabohnyan
Bak weng kilang lagee di Langsa
Gobnyan laloe jinoe meu ulang
Bandum peulajaran wajeb geubaca
- Seubab akhe thon langsong ujian
Hanjeut meu ayang lagee nyang ka – ka
Akhe tingkat sa nyata disinan
Ibrahim Hasan han taloe angka
- Ji peuek tingkat leugat masanyan
Ibrahim Hasan duek tingkat dua
Sabe rata thon langsong lagee nyan
Lam peundidikan tinggai hantom na
- Ingat peutuwah ayah saboh jan
Yoh di Beulawan intat u Jawa
Seubab peureulee ileumee Tuhan
Uleh seubab nyan sunggoh beulaja
Oleh : Nurman Syamhas